تكتبها شيرين ابوالعنين
سعد:مش عارف هقدر ابطل الخصلة دي ولا ايه
انا بقالي مدة مش مظبوط وخايف اتمسك والناس تضربني
ولا لو بلغوا عني تبقا مصيبة..
ام السعد:واد يا سعد انت هتخرج من اوضتك امتي
عايزاك تجيبلي ٢كيلو
بطاطس وخمس بيضات وكيلو رز
وانت راجع روح الفرن جيب العيش
يلا يا سعدقبل ما الفرن يقفل…
سعد:حاضر يا اما
هو مفيش غيري في البيت دا
كل يوم روح جيب يا سعد عيش
لا بطاطس لا بصل
ام السعد:بتبرطم بتقول ايه يا ولا سمعاك
اهو من نبرك دا البصل بقاب٣٠ج
امشي بقا وخلي يومك يا عدي
سعد:حاضر هغسل وشي وانزل
ولا دا كمان عليه جمرك
ام السعد:جمرك ايه دا انت غلاباوي
سعد:اللي يعشرك يا اما(بصوت منخفض)
ام السعد: برطم برطم سمعاك وربنا
سعد:هاتي الفلوس
ام السعد:امسك
سعد:فين بقا اصطباحتي
ام السعد: اصطباحة ايه يا موكوس
روح يلا من وشي جيب الطلبات
وتعالي هوا
سعد:حاضر يا ست الحبايب يا حبيبة
ام السعد:ومالك بتقولها من تحت درسك كدا ليه
يا ولا
سعد:لا يا اما بتهيألك انتي جوا جوا قلبي
ام السعد:طب يلا بلاش بكش
سعد: ماشي يلا
سعد يراوده احيانا شعور غريب واحساس طاغي عليه
عندما يري الاماكن مزدحمه بالنساء
يرغب في الدخول في تلك الاماكن ولديه احساس طاغي بالتلامس
الجسدي رغم انهم كبار في السن ويعتبر في سن اولادهم فعمره لا يتجاوز الواحد والعشرون
ام اسحاق:ايه اللي جابك في طابور الستات يا وللا
سعد :رجلياههههه
ام اسحاق:هههههه بسخريةلا خفة يا ولا
يلا امشي بدل ما تتفعص تحت رجلي
عشنا وشفنا
الست نرجس:ودا ايه كمان
مش دا الولا سعد ابن ام السعد اللي فاتحة كشك البقالة علي ناصية الشارع
ام اسحاق:اه هو يا ختتش
واد اهبل كدا ساب طابور الرجالة وجاي يقف معانا في طابور النسوان
ست نرجس:يا شيخة دا عيل من دور عيالنا
لسه صغير ما يوعاش علي الكلام دا
ام اسحاق:ابدا يا ختشي
الشباب دلوقتي عارفين كل حاجة وبيتفرجوا يا ختشي
علي الشوشيل ميدين
الست نرجس:ايه الشوشيل ميدين دي
ام اسحاق:النت يا حبيبتشي
نرجس:وانتي بقا عرفتي الحاجات دي منين
اوعي يا وليه تكوني بتتفرجي عليها(هههه)
ام اسحاق:ههههه لاضحكي اضحكي
لا يا حبيبتشي تفي من بقك فال الله ولا فالك
اعوذ بالله من غضب الله
الست نرجس:انتي زعلتي انا بهرج معاكي
ام اسحاق:تهريج ايه دا اللي ع الصبح وحاجة تغضب ربنا
دا انتي ست سمجة
الست نرجس:كدا يا ام اسحاق اني سمجة
والله محد سمج وسقيل الا انتي
ام اسحاق:بالله ان ما اتلميتي دلوقتي حالا
هفرج الناس عليكي وانتي وليه ناقصة
الست نرجس:الله يسامحك انا مش هرد عليكي عشانك ست كبيرة واد امي
ام اسحاق:نعم يا حبيبتشي اد امك ليه
دا انا اكبر منك يا دوبك بسنتين تلاته
الست نرجس :سنتين تلاته باستغراب
يعني مش يجي كدا ٢٠سنة
يا ام اسحاق
دا انتي ابنك البكري عنده٤٨سنة
وانا بنتي الكبيرة عندها ٢١
جرالك ايه يا ام اسحاق انتي بتنسي يا ختشي(بضحك)
ام اسحاق:هات يا لا يا ابني العيش عشان امشي من وش ام اربعة واربعين
الست نرجس:استغفر الله العظيم الوليه كأن قرصها تعبان لما اتكيت علي السن
يالا نهايته هي وليه كبيرة برضه لازم اخدها علي اد عقلها
مع السلامة يا ام اسحاق
ام اسحاق:سلام يلوشك
شيفاني مهاجره
الست نرجس:لا يا ختشي مش قصدي
ام اسحاق:ولا قصدك
سعد:يالا مشيني يا عم انا مش ناقص كلام زيادة من امي
عم طاهر:يعني يمشيك ويسبنا
مش بيمشي بالدور
ما تخلي عندك نظر يا ولا دا انتو جيل ما يعلم بيه الا ربنا
سعد:بصوت منخفض والله دا انتو اللي جيل معندوش رحمه
دا احنا جيلنا غلبان غلبان اوي وخصوصا لما اصحي اشوف الستات دي كلها
ادام عيني
يعني اقوم من النوم اصطبح بكل دووووووول
حراااااام
عم طاهر:انت بتقول ايه يا ولا سمعك بتغلط
سعد:سيبني في خالي والنبي
عم طاهر:طب استغفر ربنا واقف محترم
اناااااااا فهمك(بنظرة فهم وصوت يتخلله السخرية)
سعد:حاضر يا عم طاهر
اهو اخيرا دوري الحمد لله
سلام يا عم طاهر يا مقطع السمكة ودلها(بسخرية)
عم طاهر:اختشي ياولا عيب مش ادام الناس مع ترقيص حواجبه
سعد ..اما انا جبت الطلبات اهي
ام السعد:تسلم وتعيش يا حبيب امك
سعد :انا هروح الشغل بقا
ام السعد: ليه معندكش كليه النهاردة
سعد:لا يا اما مفيش محاضرات النهاردة
يلا سلام بقا
ام السعد :مع السلام يا نن عيني
سعد في طريقة استوقفته بنت تسير امامه
ايه دا ايه الشعر دا مانيكان دي ولا ايه دي شبه شيريهان
طلعت صديق سعد..
سعد انت يا ياد
انت ماشي تعاكس البنت
سعد: انت علي طول كدا ماشي ورايا
طلعت:يا عم انا رايح شغلي
وشوفتك ماشي تعاكسها
سعد:اصلها شبه شيريهان
طلعت:شيريهان مين
سعد:بتاعة الفوازير
طلعت:سلامة الشوف
انت بتشبه علي هواك ومزاجك يا بني
شيريهان مين
سعد:اهو انت كدا ملكش في الذوق
طلعت:خليك انت في زوقك
يخربيت دماغك دي مش عارف انا مصاحبك علي ايه
سعد:بقولك ايه يا طلعت استرجل كدا
طلعت:انا راجل غصب عنك
شوف انت نفسك
في حد محترم يمشي يعاكس واحدة في الشارع
سعد:تصدق انك رخم
طلعت:ماشي يا عم يلا سلام اتأخرت ع الشغل
سعد:سلام يا عم المحترم
بعد مرور ربع ساعة
سعد اه اه اه والناس حواليه بتضربه
سيبوني سيبوني
مجموعة من الناس في صوت واحد عشان تحرم
تمشي تعاكس وتقل ادبك علي بنات الناس
ست ام اسحاق الحقي يا ام السعد ابنك سعد بتضرب
اخر ناصية الشارع
ام السعد:ابني بصريخ
سعد يا سعد اوعا انت وهو سيبوه
عمل ايه عشان تتكتروا عليه يا اللي معندكوش رحمه
الناس:اسالية عمل ايه
اتحرش بواحده ماشية في الشارع
ام السعد:حقا يا ولا
سعد:غصب عني يا اما والله
ام السعد:هي دي فيها غصب عني اوم تعالي معايا يا مفضوح
ام اسحاق خير يا ام السعد
ام السعد.. بصوت منخفض ام السعد ايه
قولي ام الهم..بقهر
ابني البكري متحرش بالنسوان(بصوت منخفض وكانها توشوش نفسها
اه يا ميلة بختي فيك يا سعد
سعد ؛غصب عني يا اما
ام السعد كلامنا في البيت جوا
ادخل يا منيل
سعد:والله يا اما انا حاسس اني تعبان ومش مظبوط
ايدي بتروح لوحدها
ام السعد: بتروح لوحدها بسخرية)
بجد يا ولا
يا عني الواحد يتحرش ويستباح حرمة غيره
ويقول ايدي بتروح لوحدها
لو كان ابوك عايش مكنش سابك كدا كان رنك علقة
تفوقك
سعد:ابوس ايدك يا اما سامحيني
ام السعد:والفضيحة دي اداريها ازاي
والناس مبترحمش
واختك يا ولا مفكرتش فيها مين هيتجوزها
سعد:بيعيط
غصب عني والله غصب عني
ام السعد:قوم غور من وشي يلا سيبني اشوف اكل عيشي
وانت روح شغلك
واياك يجيلي من وراك مصيبة تاني ساعتها هبعت لخالك هو اللي هيربيك
انا كبرت خلاص مبقتش اقدر عليك
بس ودين النبي يا سعد لو عملت كدا تاني
لانت ابني ولا اعرف
سعد:لا يا اما خلاص
سامحيني بالله عليكي
ام السعد: طيب امشي دلوقتي
من وشي
سعد:حاضر انا ماشي بس بلاش تغضبي عليا يا اما والنبي انا
ماشي ببركة دعاكي
سعد..محدش فاهمني ااااه
اذا كان انا مش فاهم نفسي اصلا
مش عارف هو الاحساس اللي جوايا دا ايه بالظبط
انا عارف ان دي خصلة وحشة اوي بس اعمل ايه بضعف
ادام الحريم يخربيت كدا بجد زهقت من نفسي
انا لازم استشير حد متخصص اعرف منه ينفع اتعالج
ولا هعيش كدا
اوبا ….ايه الست دي
امممم اثبت ياسعد(يتحدث مع نفسه )بصوت منخفض
اثبت يا سعد انت لسه مضروب مش حكاية بقا
اممممم اعمل ايه اعصابي بقا
تقرب منها وحاول مسكها وفي اقل من الثانية وقع علي الارض
نتيجة الم علي وشه من احد الماره كان متابعه وشاهده
سعد..ايه دا يا عم
الرجل..دا جزاء اللي بيمشي عوج
احترم نفسك دي كبيرة عليك يا مهزء
سعد ..وانت بتضربني ليه
الرجل..احسن ما تطلب الشرطة ويجوا يكيفوك
ايه تحب ولا
سعد…لاء خلاص
الرجل ..امشي عدل يحتار عدوك فيك
واحترم نفسك
وبلاش الخصلة المهببة دي لاحسن اخرتها وحشة
سعد…بيعيط
الرجل عيط يمكن تحس بالندم وتوب
سعد..نفسي والله بس مش عارف
الرجل ..مفيش حاجة اسمها مش عارف
اوعي تطاوع شيطانك
خليك محترم الخصلة دي قذرة
فكر دي لو اختك ولا امك ولا مراتك
هيكون موقفك ايه
بلاش يا بني وتوب الي الله وخليك مؤدب
سعد..حاضر
لازم اعمل حاجة انا مش عارف انا فيا ايه بالظبط
والله ما انا شغال النهاردة
ام السعد..انت رجعت ليه ياسعد
سعد..تعبان شويه
ام السعد خدك ماله يا ولا
مين ضربك علي وشك
سعد ..مفيش
ام السعد…طيب روح البيت وانا جاية وراك
يا اخرة صبري
اه يا وجع قلبي وميلة بختي في الولا اللي حيلتي
يعني لو حرامي هقول يمكن ناقصة حاجة
لكن متحرش
امممم يمكن عايز يتجوز
لما اقوم اشوفه
سعد يا سعد
انت عايز تتجوز يا ولا
سعد…جواز ايه بس يا اما
يعني لو عايز يعني أتجوز فين وانا عندي شقة ولا خلصت دراستي
ام السعد…اومال انت بتعمل كدا ليه يا ولا
يا ولا انت هتعرني دي الناس بتقولي يا ام السعد
عايزهم يطلعو عليك متحرش ويسموني ام المتحرش
ياسعد اهدي يا بني بلاش الخصلة دي
مخفتش علي اختك
هتعمل لنفسك سمعة ولينا وهتوقف حال اختك
سعد..يعني دا كل اللي همك
بدل ما توديني عند دكتور اكشف وتطمني عليا
ام السعد..هو كل واحد بيتحرش لازم يكشف
متحترم نفسك يا اهبل
وصلي بدل ما انت مقضيها كدا
سعد..حاضر هصلي يا اما
ام السعد ..انت يا ولا زرع شيطاني
استغفر الله العظيم (بندم وحزن)
تعالي في حضن امك يا سعد
سعد..عيط
ام السعد..انت عمري يا قلب امك
انا عايزاك احسن الناس
بلاش تعملها تاني ..بتستفيد ايه يا ابني غير الضرب والتهزيق
وقلة القيمة
قيمتك يا بني في اخلاقك دي الحاجة الوحيدة اللي تخليك
ماشي مرفوع الراس والناس تحترمك
لا شهادة ولا منصب ولا اي حاجة..
هي اخلاقك..
عندك اخلاق هتحترم من الصغير قبل الكبير
خلاص ياسعد قوم اتوضا وصلي واطلب من ربنا يسامحك
وصدقني يا بني علاجك جواك انت ابعد واستعين بالله وحده
هو المنجي والمحصن والحامي ربنا يهديك يا بني
سعد…حاضر هقوم يا اما وعمل بكلامك
يارب توب عليا
يارب حصني وابعدني عن الخصلة دي
ونجيني وهو بيعيط وندمان
يارب توبت اليك توبة نصيحة
يارب سامحني ..
بعد مرور يومين
موعد الذهاب الي الكلية وحضور السيكشن
واثناء عودته شاهد سيدة تعبر الطريق وشعر بنفس الشعور الذي ينتابه
واسرع لعبور الطريق للحاق بها واذ بسيارة اجره تصطدمه
صرخ سعد وتم نقله في الحال الي المستشفي
….
ام السعد…الو مين
موظف الاستقبال..ابنك في المستشفي يا حاجة خدنا نمرتك
من الموبايل بتاعة
ام السعد…ابني جراله ايه..استر يارب
يا طلعت انزل يا طلعت
سعد في المستشفي عمل حادثه وهو راجع من الكلية
انزل وصلني بالموتوسيكل
طلعت..حاضر يا خالتي نازلك حالا
ام السعد…دخلت تدور علي ابنها وهي تشعر بثقل في قدمها من الصدمة
اااااه منك يا سعد تعبني وانت عيل حتي بعد ما كبرت
طلعت..اهو يا خالتي
ام السعد…مالك يا قلب امك
سعد..حصل خير يا امارجلي اتكسرت
بسيطة متقلقيش
ام السعد…حصل ايه احكيلي
سعد…كنت سرحان يا اما وانا بعدي الطريق
وحصل اللي حصل
اه يا اما(بصوت منخفض) لو تعرفي السبب
انا لازم اتوب المره دي بجد الحادثة دي عقاب من ربنا
ليا لازم اتوب وابعد عن السكة دي وادي اخرتها
لووفضلت في السكة دي ممكن اموت وساعتها يبقي خسرت اخرتي كمان
لا هتوب المرة دي خلاص
ام السعد…سرحان في ايه يا سعد
سعد…مفيش يا اما انا عايز اخرج من هنا
طلعت..هتقدر يعني
سعد… اه هقدر
هقدر ان شاء الله وهتغير وابقا انسان جديد
……
